(Madrid) 13 Abriil 2018 Maanta ayaa la samaynayaa isku aadka Semi Final-ka koobka horyaalada yurub, waxaana isugu soo haray 4-koox oo kala matalaya 4-dal oo kala duwan.
Real Madrid, Liverpool, Bayern Munich iyo Roma oo kala matalaya Spain, England, Germany iyo Italy ayaa loo samaynayaa duhurnimada maanta isku aadka Semi Final-ka.
Taageerayaasha kooxda Real Madrid ayaa aad uga cabsi qaba in lagu beego Semi Final-ka kooxda Liverpool sida ay baahisay Marca.
Waxayna aad u doonayaan in lagu aadiyo kooxdii soo reebtay Barcelona ee Roma, laakiin cabsidooda ugu wayn ayaa ah in aan lagu beegin Liverpool.
Ra’yi u ruurin Marca ay ka dhex samaysay taageerayaasha Real Madrid waxaa ka qayb qaatay in kabadan 62-kun oo taageerayaal ah.
51% waxay doorteen in lagu beego Roma taas oo ka dhigaysa inay tahay kooxda ay aadka u doonayaan, 29% waxay doorteen Bayern Munich, halka 20% ay doorteen Liverpool, waana kooxda tirada ugu yar ay doorteen maadaama intabadan taageerayaasha Real Madrid aysan doonayn in lagu beego.
Gool FM